Eze 7 | NdeIBE | STEP | Ilizwi likaJehova lafika kimi lisithi:

Ezekiel 7

Isiphetho Sesifikile

1 Ilizwi likaJehova lafika kimi lisithi:

2 “Ndodana yomuntu, nanku okutshiwo nguJehova Wobukhosi elizweni lako-Israyeli ukuthi: Isiphetho! Isiphetho sesifikile emagumbini amane elizwe. 3 Isiphetho sesifikile kini njalo ngizakwehlisela ulaka lwami phezu kwenu. Ngizalahlulela ngokumayelana lezenzo zenu ngilivuze kukho konke ukwenza kwenu okunengekayo. 4 Kangiyikulikhangela ngesihawu loba ngiliyekele; ngeqiniso ngizalinika umvuzo wezenzo zenu kanye lowokwenza kwenu okunengekayo phakathi kwenu. Laphoke lizakwazi ukuthi mina nginguJehova.

5 “Nanku okutshiwo nguJehova Wobukhosi ukuthi: Umonakalo! Umonakalo ongakaze ubonakale uyeza. 6 Isiphetho sesifikile! Isiphetho sesifikile! Sizivusele ukumelana lani. Sesifikile! 7 Incithakalo isifikile kini – kini lina elihlala elizweni. Isikhathi sesifikile, ilanga selisondele; kulokuphamazela, hatshi intokozo, phezu kwezintaba. 8 Sekuseduze ukuba ngithululele ulaka lwami phezu kwenu ngiqedele ukuthukuthela kwami kini. Ngizalahlulela ngokumayelana lezenzo zenu ngilivuze kukho konke ukwenza kwenu okunengekayo. 9 Kangiyikulikhangela ngesihawu loba ngiliyekele; ngizalinika umvuzo ngokumayelana lezenzo zenu kanye lokwenza okunengekayo phakathi kwenu. Lapho-ke lizakwazi ukuthi yimi mina Jehova otshayayo.

10 “Usuku selukhona! Selufikile! Incithakalo isipatshakile, induku isihlumile, ukuziphakamisa sekuqhakazile. 11 Udlakela selukhule lwaba yinduku yokujezisa ububi; kakho ebantwini ozatshiywa; kakho kuleliya xuku – akukho notho, akukho lutho oluligugu.

12 Isikhathi sesifikile, usuku selufikile. Umthengi kangathokozi kumbe umthengisi abe lusizi, ngoba ulaka luphezu kwexuku lonke.

13 Umthengisi kayikulithatha futhi ilizwe alithengisileyo nxa bobabili besaphila, ngoba umbono ngexuku lonke kawuyikuhlehliselwa emuva. Ngenxa yezono zabo kakho lamunye wabo ozalondoloza ukuphila kwakhe. 14 Loba bekhalisa icilongo benze izinto zonke zilunge, kakho ozakuya empini, ngoba ulaka lwami luphezu kwexuku lonke.

15 “Ngaphandle kulempi, ngaphakathi kulesifo lendlala; labo abasemaphandleni bazabulawa ngenkemba, njalo labo abaphakathi kwedolobho bazaqothulwa yindlala lesifo. 16 Bonke abasindayo baphunyuke bazakuba sezintabeni, bebubula njengamajuba asezigodini, yilowo lalowo ngenxa yezono zakhe. 17 Izandla zonke zizaxega, lamadolo wonke abe buthakathaka njengamanzi. 18 Bazagqoka amasaka babe lokwesaba. Ubuso babo buzakuba lehlazo lamakhanda abo aphucwe. 19 Bazalahlela isiliva sabo emigwaqweni, legolide labo lizakuba njengento engcolileyo. Isiliva sabo legolide labo akuyikwanelisa ukubakhulula ngosuku lolaka lukaJehova. Bangeke baqede ukulamba kwabo kumbe bagcwalise izisu zabo ngakho, ngoba sekubenze bakhubeka esonweni.

20 Babeziqhenya ngeziceciso zabo ezinhle abazisebenzisa ekwenzeni izithombe zabo ezinengekayo lezifanekiso zabo ezenyanyekayo. Ngakho ngizaguqula lokhu kube yizinto ezingcolileyo kubo. 21 Konke ngizakunika abezizweni njengempango lakwababi basemhlabeni njengezinto ezithunjiweyo, njalo bazakungcolisa. 22 Ngizasusa ubuso bami kubo, njalo bazangcolisa indawo yami eligugu; abaphangi bazangena kuyo bayingcolise.

23 Lungisani amaketani ngoba ilizwe ligcwele ukuchitheka kwegazi ledolobho ligcwele udlakela. 24 Ngizaletha izizwe ezimbi kakhulu ukuba zithathe izindlu zabo; ngizaqeda ukuzigqaja kwabalamandla lezindawo zabo ezingcwele zizangcoliswa. 25 Lapho ukwesaba kufika, bazafuna ukuthula, kodwa akuyikuba khona. 26 Umonakalo phezu komonakalo uzafika, lamahungahunga phezu kwamahungahunga. Bazazama ukuthola umbono kumphrofethi; ukufundiswa komthetho ngumphristi kuzasweleka njengokuzakwenzakala ngokweluleka kwabadala. 27 Inkosi izalila, inkosana izaphelelwa lithemba, lezandla zabantu belizwe zizaqhaqhazela. Kubo ngizakwenza okumayelana lezenzo zabo, ngibahlulele ngemithetho yabo. Lapho-ke bazakwazi ukuthi mina nginguJehova.”